"V jenon lopižu skuhaj, dijače, fažol, a va drugon suho meso od prasca ča su vratina ali ča su rebra ali rep ali uši ali glava ali kosti, bašta da lipo vonja po suhon mesu.
Va treton loncu najprija kladi na uju od maslin zrizanu kapulu i dva zrizana zrna česna i muke pak mrigaj i frigano zalij z vodu va kojoj se je kuhalo suho meso, a onda va toj vodu kuhaj očišćeni kunpir ki si zrizal na mali kvadratići.
Stavi le i paštu da se va toj vodi prokuha a onda prehiti va ta lonac skuhani fažol i skuhano suho meso, pridaj sol (ako rabi) i mljeni papar i meljenu črljenu papriku.
A kad je maneštra gotova, ne nosi ju na stol, nego pušćaj da niko vrime počiva pak će postat gusta i gustoža.
Ovo ti je, dijače, pravi urdin kako se parićava prava mostirska mineštra."
Recept iz "Gaštronomije" grišnega fra Karla iz Dubašnice.