StoryEditor
SplitHumoreska za svetoga Duju

Viron kontra virusa

Piše Nađan Dumanić
6. svibnja 2020. - 11:52
Jakov Prkic/Cropix

- Frane a ča si mi se taka prid televiziju jušto sa' ka' je misa. U crikvu se nemore zaraj ovega vražjega virusa pa me pušti barenko ovi po' ure da se na miru pomolin za svij nas.

- Pa neću ti ja smetat baba.

- I ti ka ministrant bi triba bit ovod, a ne stalno na oti mob, tu škatulu, en ti onega ča ga je izumislija. A ča ti je u ruku ti škartoc?

- Pa zaraj tega i jesan ovod, sama si rekla da san ministrant, a ča ministrant čini ka' je misa, vengo stoji kraj popa i čeka da gre skupit limozinu, škartoc je za limozinu i neka znaš zbrojat ću koliko si dala. Dida je na teracu, a već mi je da prin mise.

- Ma je li ti to mene voltaješ.

- Nije baba evo slušaj popa, ništa ne obadaješ, prin dvi minute je reka da se sa' triba duplo odricat i zaraj korizme i zaraj korone.

- Biži ča tovare jedan, da ti tebi i popu, molit se triba, kome je do pinez, ma jesi ti vidija muzuvira, limozinu mi je doša kupit ovod u tinel, biži ča gori u matere.

E, vaja sa' rastumačit jednu stvar. Frane je živi s materon, čačon i sestron na prvi pod, a doli u prizemje su bili baba i dida, i svaki je jema svoj komod. To in je bila starina po famiji, mala kućica, ma na svoje si i za svoj mir. U jovo doba izolacjuna da jemaš kuću ka' Dijoklecijanov palac, bila bi mala za švog. A dica ka' dica, Frane bi po ijadu puti iša gori-doli, a baba je uvik ronjala da će jon cilu kuću razladit o vele furje.

Omar ujutro evo ti Frane najranije u babe. Ona i dida piju bilu kafu i drobidu galetine unutra.

- Dobro jutro baba i dida - pozdravi ji s vrat.

- Vazmi galetinu - reče mu dida u po' supanja.

- Ako je vazme mora je platit dvi kune, tako je i on meni limozinu jučer iska.

- Ma je li to moguće Frane, babu tako štucigavat, vengo potla ka' buden u vrtal dojdi mi dat ruke okolo onega boba - izajde dida užgat španjulet.

- Baba nemoj se na me jidit, znaš koliko ja tebe volin.

- A najboje da me ne voliš, ko te odgojija doklen su ti mater i čača na posal, ko ti marendu stiva, ko te u skulu opremi!

- Baba, rekla je meštrovica da se ni dobro puno falit, vengo bi li ti sa' gledala jopet misu potla kafe.

- Da bili, siguro bi, znaš da ja dva puta gren u crikvu ka' mogu, ujutro i poza podne, ujutro se pomolin za se i moje pokojne, a poza podne za sve vas.

- Dobro, ovu pozapodne jemaš na te-ve u šest uri, a ja ti mogu sredit da jemaš i ovu ujutro u koju ko' uru ti želiš.

- A Frane jopet si me najranije doša voltavat, daj mi mira.

Triba oviman u Zabreg poslat pet kuna zanamisto limozine i onda ti oni samo za te daju misu.

- A Bože mi prosti, ka da unaprid platiš misu za pokojne, ma kako ti to moreš, a ja ne mogu.

- Znaš li baba ča je šifra, to je numer ka' tebi na penšjun. E mi ministranti jemamo svoju šifru i samo je priko mobitela pošajemo, platimo pet kuna i namistimo da nan na te-ve bude misa.

- Dobro, a kako ćeš ti njima poslat pet kun, golubon?!

- Baba pa ti ništa ne kontaš, ja na svoj konat na mob jeman pineze ča mi mater mekne na banku, ti meni daš usuvo, a ja tebi zajan ove moje s mobitela. Pare na sunce i misa gre.

- Ajde da vidimo i to čudo, evo ti pet kun.

Mekne Frane pineze i žep, ka' za fintu ništo vrti po mobitelu i onda se babi pofali: Evo ga, dali su mi zeleno svitlo, sa' ću ti sve naštimat.

Frane vrati misu od sinoć jerbo se to more vratit tri dana u rikverac, a baba samo ča ni pala u jafan, zlamenovala se i cila incukana rekla unuku:

- Ajme, a ja san mislila da me jopet voltaješ, moga si mi na vrime reč da omar gre, nisan se ni priobukla za misu.

Ni bidna ni sinjala da je sve isto ka o' jučer.

- Gledaj sa' na miru, a ja gren u vrtal vidit ča dida triba.

Dojde do dide, a stari sedi, smije se i sluša grdelina u čibu.

- A ča si me triba dida?

- Ništa samo san te tija pofalit kako ti je ona batuda o jučer s limozinon bila divota, evo svaki put ka' se sitin dojde mi se smijat. Evo ti deset kun za ofertu i svaki put ka ča glendaš babu dobit ćeš jopet!

Zove ga gori baba, Frane moj dojdi vamo i dočin je doša polagodila ga je po glavi.

- Koliko si me jučer snerva, sa' si se opoštenija, vidiš kako je dobro ča san te u ministrante upisala... Zvala san ove moje prijatejice, sve doma stoju, krunicu vrtidu i čekaju onu misu u šest uri. Začudile su se da ja jeman misu i ujutro, izvrtile su sve programe, ma ništa, da kako. Lipo sinjate i vi unuke u ministrante pa ćete jemat misu u uru ka' želite i po' pet puti na dan.

- Baba pofalit ću te don Jozi da ti jedina u cilu župu nisi izgubila užancu da greš na dvi mise.

- Ne tribaš ti mene falit, a i ne smi se izlazit, znaš ča je glavna šentenca: ostani doma.

- Znan baba ja tu priporuku, a znan i da svaki put ka' ja zoven one u Zagreb oni sami pošaju don Jozi ko je u njegovu župu misu naručija. E i uštima san da ti svaku šetimanu jedna misa bude mukte, miritaš baba.

- E pametno moje, Bog ti da zdravja, tebi i svima nan.

- Vengo da ne zaudobin; onu misu za Svetega Duju moreš gledat koliko puti očeš, samo mi reci kad.

- A koliko će me to pizat je li joščec skupje?

- Ništa baba, to grad časti na dan našega patrona! Ako već zagrebačke mise plačaš, barenko je ova naša spli'ska mukte, ne samo tebi vengo cilemu Splitu i svitu!

I na dobro Van došla Sudamja, Splićani i Splićanci moji, a naš sveti Dujam neka nas sve skupa škapula od ove dižgracije.

Autor: prof. Nađan Dumanić

#SUDAMJA 2020

Izdvojeno

27. lipanj 2020 04:44