"Zemi, dijače, dobroga beloga bakalaja, z beton od driva da peštaj i čistun vodun zi gušterne ga polivaj, sve drioman ga peštajuć dok ne zmoliš tri Očenaši. Daj ga u lopiž ter ga skuhaj, koliko ti se, o dijače, para da je potriba.
Znemi ga, rasplati, s pomnju ga očisti od kosti i kože, i paričaj redon na ovi doli opisani način:
Zemi slanih srdel koliko se pristoji i ne dometaj soli.
Zemi masline stučene ali mljene, česna jošće i peršimula na daski skusana, papra stučena, mrvic o' hliba beloga, sve ti sve to lipo zmišaj.
Stavi čisto ulje od maslin na dno padele i kunpira presnoga na fete zrizana, na to drugi red bakalaja, pa onu paštelu rečenu i tako redon čini po redu, i čini tri puti, ali kuoliko puti kuoliko je ust od bratje ki će ovo jilo uživati u miru i jubavi brackoj.
Zalij sve ovo gori pisano z vodu od bakalaja, kada se skuha dodaj, malo ali puno, kako ćeš, vina belog, dobroga i nekiselog, i pridaj na svrsi malo skuti, i šug o' jednoga linuncina i pusti da hiti dva tri vrutka.
A kada budete uživali, spomenite se i mene nedostojna grišnika, izilice i ljupilice, ter rec'te, ako si živ Bog ti daj sriću i zdravje, ako nisi Bog te pomiluj."
Recept iz "Gaštronomije" grišnega fra Karla iz Dubašnice.